Eolas d’oideoirí

Tá sainchúram mór ag Coimisiún na Meán i rialáil agus i bhforbairt na meán. Tá a fhios againn go bhféadfadh sé a bheith deacair do mhúinteoirí agus d’oideoirí an t-am a fháil chun taighde a dhéanamh ar dhlíthe agus eagraíochtaí nua. Féach an chuid Maidir linn chun níos mó a thuiscint faoi ról an Choimisiún.

Gheobhaidh tú acmhainní éagsúla ar an leathanach seo chun cabhrú leat tuiscint níos fearr a fháil ar ról Choimisiún na Meán, ina measc pleananna ceachta agus físeán chun eolas a thabhairt do dhaltaí ar an gcaoi a gcosnaíonn Coimisiún na Meán cearta ar líne.

D’fhéadfadh ról Choimisiún na Meán agus a chumhachtaí chun cearta a chosaint ar líne a bheith ina ábhar spéise sna hábhair mheánscoile seo a leanas:

Oideachas Sóisialta, Pearsanta agus Sláinte (OSPS) 
Oideachas Saoránach Sóisialta Polaitiúil (OSSP) 
Inniúlacht ar na Meáin Dhigiteacha (gearrchúrsa roghnach don Teastas Sóisearach) 
Béarla  
Oideachas san Eitic  
An Pholaitíocht agus an tSochaí 
Gnó 
Stair

Pleananna ceachta

Ceapadh ár bpleananna ceachta chun cabhrú leat ról Choimisiún na Meán a chur i láthair do ranga agus chun iniúchadh a dhéanamh ar chearta faoinár gCreat Sábháilteachta ar Líne.

Tá Treoir do Mhúinteoirí agus póstaeir in-íoslódáilte ar leith ag gabháil leis na pleananna ceachta seo.

Seo breac-chuntas ar a bhfuil i ngach plean ceachta: 

Plean Ceachta don tSraith Shóisearach

Plean Ceachta don tSraith Shinsearach

Ar fáil don tSraith Shóisearach agus don tStraith Shinsearach

Tá an físeán thíos ina chuid den phlean ceachta. Tugtar cur síos ann ar na cearta a thugann ár gCreat Sábháilteachta ar Líne do dhaoine óga

Tá grafaic faisnéise  ag an gCoimisiún freisin ina mínítear na cearta atá ag daltaí faoin gCreat Sábháilteachta ar Líne.

Íoslódáil an Ghrafaic Faisnéise (PDF)

Déanfaimid an leathanach seo a nuashonrú go rialta le tuilleadh treorach agus acmhainní. Más mian leat aiseolas a thabhairt dúinn ar ár bplean ceachta, nó má tá aon treoir eile is mian leat a thabhairt dúinn, comhlánaigh an suirbhé gearr seo.

Ceisteanna Coitianta do Mhúinteoirí

Tháinig dalta chugam ag iarraidh cabhair a fháil chun ábhar mídhleathach a thuairisciú. Cad a dhéanfaidh mé?  

Má fheiceann tú ábhar mídhleathach ar líne, tuairiscigh don ardán é tríd an gcóras tuairiscithe d’ábhar mídhleathach agus luaigh go soiléir cén dlí atá á shárú aige. Is féidir go mbeidh an leathanach maidir le  Cad is ábhar mídhleathach ann? ina chúnamh.
Is féidir go mbeidh ort URL/URLanna an ábhair a cheapann tú a bheith mídhleathach a chur ar fáil, chomh maith le seoladh ríomhphoist ionas gur féidir leis an ardán teacht ar ais chugat.
Faoin nGníomh um Sheirbhísí Digiteacha, ceann de na dlíthe inár gCreat Sábháilteachta ar Líne, caithfidh an t-ardán freagra a thabhairt duit go tráthúil agus an t ábhar a bhaint, nó a mhíniú duit cén fáth nach bhfuil sé á bhaint acu.
Mura bhfuil tú sásta lena gcinneadh, caithfidh siad bealach a thabhairt duit freisin lena gcinneadh a achomharc.

Mura bhfreagraíonn an t ardán do thuairisc ar bhealach tráthúil, nó mura féidir leat an córas tuairiscithe a aimsiú, is féidir leat tuairisc a chur chuig Coimisiún na Meán. 

Cad is brí le ‘freagra tráthúil’? An bhfuil aon treoirlínte ann maidir le cé chomh fada atá i gceist leis sin?

Cé nach bhfuil aon tréimhse chinnte leagtha amach le haghaidh ‘freagra tráthúil’, de ghnáth déanfaidh ardáin iarracht an t-ábhar mídhleathach a bhaint chomh tapa agus is indéanta. 

Cad é an chéad rud eile is féidir le Coimisiún na Meán a dhéanamh más féidir gur sháraigh ardáin an dlí?

Tá cumhachtaí éagsúla ag Coimisiún na Meán. Nuair a fhaighimid tuairiscí ón bpobal faoi ardáin a líomhnaítear go bhfuil na rialacha á sárú acu, fiosraímid sin. Má fhaighimid amach go bhfuil ardán ag sárú na rialacha agus nach bhfuil sé ag comhlíonadh a oibleagáidí dlíthiúla faoin gCreat Sábháilteachta ar Líne, is féidir linn imscrúdú a thosú.  Má fhaighimid amach gur sháraigh ardán na rialacha, is féidir linn rabhaidh agus fíneálacha a eisiúint. Mar shampla, d’fhéadfadh fíneálacha suas le 6% de láimhdeachas an ardáin a bheith mar thoradh ar sháruithe ar an nGníomh um Sheirbhísí Digiteacha.  Cé nach mbíonn imscrúdú ina thoradh ar gach tuairisc a fhaighimid, dá mhéad eolais a fhaighimid faoi do thaithí ar ábhar a thuairisciú agus déileáil le hardáin, is amhlaidh is fearr is féidir linn ár ról a dhéanamh.  

An féidir le Coimisiún na Meán ábhar mídhleathach a bhaint dom féin nó do mo dhaltaí?

Ní féidir. Níl sé de chumhacht ag Coimisiún na Meán ábhar mídhleathach a bhaint anuas láithreach ón idirlíon. Mar rialálaí meán, is é an ról atá againn ná a chinntiú go bhfuil ardáin ag cloí leis na rialacha faoin gCreat Sábháilteachta ar Líne. Má ghlaonn tú ar ár n-ionad comhairle agus murab é Coimisiún na Meán an eagraíocht cheart chun cabhrú leat, déanfar thú a threorú chuig an eagraíocht cheart. 

Cad is gá domsa/do mo dhaltaí a dhéanamh má fheicim/má fheiceann siad ábhar díobhálach ar líne?  

Sainmhíníonn an Cód Sábháilteachta ar Líne in Éirinn cad is ábhar díobhálach ann. Áirítear le hábhar díobhálach ábhar féinmharaithe, cibearbhulaíocht agus neamhoird itheacháin a chur chun cinn nuair a chruthaíonn an t-ábhar sin baol do shaol duine nó dochar suntasach do shláinte fhisiciúil nó mheabhrach duine. Faoin gCód, sa chás go bhfuil ábhar den sórt sin ina chúis le baol do bheatha nó go ndéanfaí díobhálach shuntasach do shláinte fhisiciúil nó mheabhrach duine, ní mór d’ardáin an t-ábhar a shrianadh óna seirbhís trína dtéarmaí agus coinníollacha agus ligean d’úsáideoirí ábhar den sórt sin a thuairisciú nó a mharcáil. Ba cheart duit ábhar díobhálach a thuairisciú i gcónaí don ardán ar a bhfaca tú é. Mura ndéanann ardáin an t ábhar díobhálach sin a scriosadh go tráthúil, is féidir leat é sin a thuairisciú do Choimisiún na Meán.  Má cheapann tú go bhfuil do shaol féin nó saol do dhaltaí i mbaol, ba cheart duit teagmháil a dhéanamh leis na Gardaí i gcónaí ar 999 nó 112.

Táim buartha faoi ábhar sceimhlitheoireachta ar líne. Mar mhúinteoir, cad a dhéanfaidh mé má fheicim a leithéid?

Má fheiceann tú ábhar ar ardán atá ag spreagadh nó ag glóiriú gníomhaíochtaí sceimhlitheoireachta nó ag cur a leithéid chun cinn nó ag tacú leo, tuairiscigh láithreach é don ardán inar aimsigh tú é. Ba cheart duit an t ábhar sin a thuairisciú do na Gardaí freisin.
Más rud é go bhfuil bagairt láithreach ar do shaol nó ar do shábháilteacht, glaoigh ar na Gard aí ar 999 nó 112.

Táim beagáinín neirbhíseach faoin ábhar seo a mhúineadh. Níl mórán eolais agam air, agus athraíonn sé go léir chomh tapa sin. An mbeidh níos mó acmhainní ar fáil ó Choimisiún na Meán ar ábhair eile?

Beidh, tá foireann thiomnaithe um Litearthacht sna Meáin agus Oideachas Úsáideoirí ag Coimisiún na Meán. Is í an acmhainn oideachais seo ár gcéad fhoilseachán, ach táimid ag súil go gcruthófar níos mó acmhainní sa todhchaí. Tá do chuid aiseolais tábhachtach agus luachmhar mar sin líon isteach ár suirbhé chun a chur in iúl dúinn cad iad na réimsí/na hábhair ar mhaith leat a bheith cumhdaithe.   