Cé leis a mbaineann sé?

Tá feidhm ag an DSA maidir le raon leathan seirbhísí a sholáthraítear ar líne, ar a dtugtar ‘seirbhísí idirghabhálacha’, lena n-áirítear margaí ar líne, na meáin shóisialta agus ardáin comhroinnte ábhair, aipmhargaí, agus ardáin taistil agus chóiríochta ar líne do sholáthraithe seirbhíse idirlín agus do líonraí seachadta ábhair.

Soláthraithe Seirbhísí Idirghabhálacha (ISPanna) — Sainmhínithe catagóire

Seirbhís cainéil fhóraigh

Is éard atá ann ná tarchur i líonra cumarsáide ar fhaisnéis arna soláthar ag faighteoir na seirbhíse, nó rochtain a sholáthar ar líonra cumarsáide.

• Samplaí: soláthraithe seirbhísí idirlín; seirbhísí teachtaireachtaí díreacha; líonraí príobháideacha fíorúla; córais ainmneacha fearainn; prótacal idirlín guthaithe; clárlanna ainmneacha fearainn barrleibhéil.

Seirbhís thaiscthe

Is éard atá ann ná tarchur i líonra cumarsáide ar fhaisnéis arna soláthar ag faighteoir na seirbhíse, lena mbaineann stóráil uathoibríoch, idirmheánach agus shealadach na faisnéise sin, arna dhéanamh chun tarchur ar aghaidh chuig faighteoirí eile a dhéanamh níos éifeachtúla arna iarraidh sin dóibh, agus chun na críche sin amháin.

• Samplaí: líonraí seachadta ábhair; seachfhreastalaithe oiriúnaithe ábhair nó seachfhreastalaithe droim ar ais.

Seirbhís óstála

Stóráil faisnéise arna soláthar ag faighteoir na seirbhíse, agus arna iarraidh sin d’fhaighteoir na seirbhíse.

• Samplaí: soláthraithe néalseirbhísí; margaí ar líne; na meáin shóisialta; aipmhargaí; ardáin taistil agus chóiríochta.

Catagóirí Soláthraithe Seirbhíse Idirghabhálacha

Catagóir 1: Soláthraithe Seirbhísí Idirghabhálacha

Baineann sé le heagraíochtaí a sholáthraíonn seirbhísí arb é atá iontu seirbhís ‘cainéil fhóraigh’, seirbhís ‘thaiscthe’ nó seirbhís ‘óstála’. Is fothacair de Chatagóir 1 seo iad Catagóirí 2-4. 

Catagóir 2: Soláthraithe Seirbhísí Óstála

Is soláthraithe seirbhísí idirghabhálacha iad seirbhísí óstála a stórálann faisnéis arna soláthar ag faighteoir na seirbhíse, agus arna iarraidh sin d’fhaighteoir na seirbhíse. 

Catagóir 3: Ardáin ar Líne

Is éard is ‘Ardáin ar Líne’ ann seirbhísí óstála a stórálann agus a scaipeann faisnéis ar an bpobal, arna iarraidh sin d’fhaighteoir na seirbhíse (mura mionghné agus gné choimhdeach amháin de sheirbhís eile nó mionfheidhmiúlacht de chuid na príomhsheirbhíse atá sa ghníomhaíocht sin agus, ar chúiseanna teicniúla agus oibiachtúla, nach féidir a úsáid gan an tseirbhís eile sin, agus nach bealach é comhtháthú na gné nó na feidhmiúlachta sin sa tseirbhís eile le dul timpeall ar infheidhmeacht an DSA).

Catagóir 4: Ardáin an-mhór ar Líne agus Innill Chuardaigh an-mhór ar Líne

Ardáin an-mhór ar Líne (VLOPanna): Is ardáin ar líne iad VLOPanna a bhfuil 45 milliún nó níos mó d’fhaighteoirí gníomhacha míosúla na seirbhíse acu san Aontas (arb ionann iad agus 10% de dhaonra an Aontais).  

Innill Chuardaigh an-mhór ar Líne (VLOSEnna): Is innill chuardaigh iad VLOSEnna a bhfuil 45 milliún nó níos mó d’fhaighteoirí gníomhacha míosúla na seirbhíse acu san Aontas (arb ionann iad agus 10% de dhaonra an Aontais).

Cur i bhfeidhm na rialacha

Tá feidhm ag rialacha an DSA maidir le gach Soláthraí Seirbhísí Idirghabhálacha (ISPanna) a chuireann a gcuid seirbhísí ar fáil sa Mhargadh Aonair Eorpach, bíodh siad lonnaithe san Aontas nó lasmuigh de.