Conas is féidir liom tuairisciú d’ardáin?

Agus ábhar mídhleathach á thuairisciú agat, beidh ort an fhaisnéis seo a leanas a chur isteach ionas go mbeidh dóthain faisnéise ag an ardán chun an tuairisc a phróiseáil:  

• Cén fáth a gcreideann tú go bhfuil an t-ábhar mídhleathach 
• Suíomh an ábhair, e.g. an URL beacht/na URLanna beachta
• D’ainm agus do sheoladh ríomhphoist, ach amháin i gcásanna ábhair a bhaineann le hÁbhar Mí-Úsáide Gnéasaí Leanaí (CSAM)
• Ráiteas lena ndeimhnítear go gcreideann tú go hionraic go bhfuil ábhar an fhógra cruinn agus iomlán

Chun ábhar a sháraíonn téarmaí agus coinníollacha an ardáin a thuairisciú, is gnách go mbeidh ort cineál eile tuairisce a chur isteach agus beidh ort a shonrú cad iad na téarmaí agus coinníollacha/caighdeáin phobail a sáraíodh. Uaireanta, d’fhéadfadh sé nach mbeadh ábhar díobhálach mídhleathach ach is féidir é a thuairisciú nuair a sháraíonn sé téarmaí agus coinníollacha an ardáin. 

Treoracha maidir le tuairisciú agus sonraí teagmhála

D’fhorbraíomar treoracha mionsonraithe (PDFanna) maidir le tuairisciú do na hardáin seo a leanas:

Ní mór d’ardáin pointe teagmhála aonair a bheith acu atá soláimhsithe agus a ligeann d’úsáideoirí modhanna cumarsáide a roghnú, nach féidir a uathoibriú go hiomlán. Ní mór an pointe teagmhála aonair a chur ar fáil go poiblí, ní mór rochtain éasca a bheith air agus ní mór é a choinneáil cothrom le dáta. 

Díospóidí le hardáin

Má bhíonn tú i ndíospóid le hardán, tá tú i dteideal Comhlacht deimhnithe um Réiteach Díospóidí Lasmuigh den Chúirt (Comhlacht ODS) a roghnú chun an díospóid a réiteach. D’fhéadfaí a áireamh ar dhíospóidí tuairiscí nár réitíodh trí chórais tuairiscithe inmheánacha an ardáin. 

Ceanglaítear ar Chomhlachtaí ODS deimhnithe a gcinntí a chur ar fáil duit agus don ardán laistigh de thréimhse réasúnta ama agus tráth nach déanaí ná 90 lá tar éis an gearán a fháil. I gcás díospóidí an-chasta, féadfaidh an Comhlacht ODS deimhnithe síneadh 90 lá breise a chur leis an tréimhse 90 lá. 

Má chinneann an Comhlacht ODS an díospóid i d’fhabhar, ceanglaítear ar an ardán na táillí go léir a ghearrann an Comhlacht ODS a íoc agus aon chostais réasúnta eile a aisíoc leat. 

Má chinneann an Comhlacht ODS an díospóid i bhfabhar an ardáin, ní cheanglaítear ort aon táillí ná costais eile a d’íoc an t-ardán i ndáil le réiteach na díospóide a aisíoc, mura gcinneann an Comhlacht ODS gur ghníomhaigh tú de mheon mímhacánta.

Ní mór d’ardáin a chinntiú go leagann a gcomhéadan ar líne béim ar an bhféidearthacht rochtain a fháil ar Chomhlacht ODS deimhnithe. Féadfaidh ardáin diúltú dul i dteagmháil le Comhlacht ODS má réitíodh díospóid cheana féin agus úsáid á baint as an bhfaisnéis chéanna agus as na forais chéanna maidir le mídhleathacht líomhnaithe nó neamh-chomhoiriúnacht ábhair.

Comhlachtaí ODS Deimhnithe

Deonaíodh deimhniú Chomhlacht ODS don Ionad Eorpach um Achomhairc (ACE) ar feadh tréimhse 5 bliana, ón 26 Meán Fómhair 2024 go dtí an 26 Meán Fómhair 2029. Is é an réimse saineolais dár deonaíodh an deimhniú cur i bhfeidhm agus forfheidhmiú théarmaí agus choinníollacha na n-ardán ar líne. Is cuideachta é ACE atá cláraithe in Éirinn.