Coimisiún na Meán

Author: Aoife Molloy

Glacann Coimisiún na Meán Cód deiridh Sábháilteachta Ar Líne 

Posted on by Aoife Molloy

Beidh feidhm ag rialacha ceangailteacha sábháilteachta ar líne maidir le hardáin comhroinnte físeán bunaithe in Éirinn

Inniu (21.10.2024), d’fhoilsigh Coimisiún na Meán an Cód críochnaithe Sábháilteachta Ar Líne. Leis an gCód leagtar síos rialacha ceangailteacha a bhaineann le hardáin comhroinnte físeán a bhfuil a gceanncheathrú AE acu in Éirinn. Tiocfaidh na hoibleagáidí ginearálta a fhaightear sa Chód i bhfeidhm ón mhí seo chugainn agus beidh tréimhse chur chun feidhme ag na hardáin d’fhoráil áirithe mionsonraithe, a theastaíonn togáil teicneolaíochta, le teacht le chomhlíontacht. Glacfaidh Coimisiún na Meán cur chuige maoirseachta maidir leis an gCód a fhorfheidhmiú, agus é á áirithiú go gcuirfidh ardáin córais iomchuí chun feidhme chun forálacha an Chóid a chomhlíonadh.

Tríd an gCód tugtar oibleagáidí isteach ar ardáin comhroinnte físeán chun daoine, agus leanaí go háirithe, a chosaint ar fhíseáin agus ábhar gaolmhar díobhálach, lena náirítear:

  • Cosc a chur le hábhar díobhálach a uaslódáil nó a chomhroinnt ar a seirbhísí lena náirítear cibearbhulaíocht, a bheith ag cur féindochar nó féinmharú chun cinn agus neamhoird itheacháin nó bheathaithe a bheith á gcur chun cinn chomh maith le gríosú chun fuatha nó foréigin, sceimhlitheoireacht, ábhar maidir le mí-úsáid gnéis leanaí, ciníochas agus seineafóibe.
  • Úsáid a bhaint as dearbhú aoise ionas nach bhfeicfidh leanaí pornagrafaíocht ná foréigean gan ghá ar líne agus bearta fíoraithe aoise a bheith i bhfeidhm mar is iomchuí.
  • Rialúcháin tuismitheoirí a chur ar fáil le haghaidh ábhar a d’fhéadfadh díobháil a dhéanamh d’fhorbairt fhisiciúil, meabhrach nó mhorálta i bpáistí faoi 16 bliana déag.

Beidh ar na hardáin sin a áirithiú freisin go gcuirfidh siad bealaí ar fáil do dhaoine chun ábhar lena mbristear na rialacha a thuairisciú, agus go ngníomhóidh siad ar na tuairiscí sin i gcomhréir lena gcuid Téarmaí agus Coinníollacha.

Rinneadh eolas d’fhorbairt an Chóid trí ghlao tosaigh ar ionchuir i samhradh na bliana 2023, agus bhí comhairliúchán poiblí iomlán ann ina dhiaidh sin ó mhí na Nollag 2023 go mí Feabhra 2024, rud a fuair nach mór 1400 freagra. Chuathas i gcomhairle freisin leis an gCoiste Comhairleach Óige de chuid Choimisiún na Meán maidir le forbairt an Chóid. Tugadh fógra don Choimisiún Eorpach faoin gCód ansin faoi phróiseas na Treorach um Chóras Faisnéise um Rialacháin Theicniúla (TRIS) chun ailíniú le Gníomh um Sheirbhísí Digiteacha an Aontais Eorpaigh a áirithiú.

Tá an Cód mar chuid den Chreat foriomlán Sábháilteachta ar Líne de chuid Choimisiún na Meán. Leis an gCreat seo, beidh seirbhísí digiteacha freagrach as an gcaoi a dtugann siad cosaint d’úsáideoirí ar dhíobháil ar líne. Bainfidh an Cód nuashonraithe, agus na codanna eile den Chreat Sábháilteachta ar Líne, cuspóirí an Achta um Shábháilteacht ar Líne agus Rialúchán na Meán amach, rud a fhágfaidh go mbeidh eispéiris níos sábháilte ar líne ag daoine fud fad na hÉireann. Tugtar na huirlisí do Choimisiún na Meán sa Chreat Sábháilteachta ar Líne ina iomláine chun aghaidh a thabhairt ar na bunchúiseanna atá le díobháil ar líne, lena náirítear infhaighteacht an ábhair neamhdhleathaigh, tionchar díobhálach na gcóras molta, agus cosaintí uireasacha le haghaidh páistí ar sheirbhísí na meán sóisialta.

Dúirt An Coimisinéir Sábháilteachta ar Líne, Niamh Hodnett: “Le glacadh an Chóid Sábháilteachta Ar Líne cuirtear deireadh le ré fhéinrialúchán na meán sóisialta. Tríd an gCód, leagtar síos rialacha ceangailteacha atá le leanúint ag ardáin comhroinnte físeán chun an díobháil is féidir leo a dhéanamh d’úsáideoirí a laghdú. Oibreoimid chun deimhin a dhéanamh de go mbeidh daoine ar an eolas faoina gcearta nuair a théann siad ar líne agus tabharfaimid na hardáin chun cuntais agus déanfaimid gníomh nuair nach gcomhlíonann ardáin a noibleagáidí.”

Dúirt Cathaoirleach Feidhmiúcháin Choimisiún na Meán, Jeremy Godfrey: “Le glacadh an Chóid Sábháilteachta Ar Líne, tá na gnéithe uile dár gCreat Sábháilteachta ar Líne i bhfeidhm anois. Díreoimid anois ar an gCreat a chur chun feidhme go hiomlán agus athruithe dearfacha a spreagadh i saol daoine ar líne. Tá an teachtaireacht atá againn do dhaoine soiléir: má thagann tú ar rud éigin is dóigh leat atá mídhleathach nó in aghaidh na rialacha atá ag an ardán féin maidir lena gceadaíonn sé, ba cheart duit é a thuairisciú go díreach don ardán. Tá ár Ionad Teagmhála ar fáil le chomhairle nó treoir a thabhairt do dhaoine má tá cabhair uathu.”

Dúirt an tAire Turasóireachta, Cultúir, Ealaíon, Gaeltachta, Spóirt agus Meán, Catherine Martin TD: “Fáiltím roimh ghlacadh Coimisiún na Meán lena gcéad Chód Sábháilteachta Ar Líne. Ag tógáil ar an mbunsraith atá leagtha amach san Acht um Shábháilteacht ar Líne agus um Rialáil Meán 2022, is céim mhór chun cinn é an cód seo maidir le sábháilteacht ar líne. Tugann sé isteach fíor-chuntasacht maidir le hardáin comhroinnte físeán ar líne agus ceanglaítear orthu beart a dhéanamh chun iad siúd a úsáideann a n-ardáin a chosaint, lena n-áirítear trí nósanna imeachta láidre um láimhseáil gearán a bheith acu agus fíorú aoise éifeachtach a thabhairt isteach. Déanfaidh sé sinn go léir, ach go háirithe ár bpáistí, níos sábháilte ar líne.” 

Seolann Coimisiún na Meán babhta nua den Scéim Urraíochta – suas le €300,000 ar fáil d’imeachtaí agus do ghníomhaíochtaí earnáil na meán cumarsáide

Posted on by Aoife Molloy

Tugtar cuireadh do ghrúpaí ar spéis leo iarratas a dhéanamh faoin spriocdháta Dé Luain, 4 Samhain.

Tá babhta nua maoinithe seolta ag Coimisiún na Meán inniu (08.10.24) faoina Scéim Urraíochta. Tá suas le €300,000 san iomlán á chur ar fáil chun tacú le raon imeachtaí agus gníomhaíochtaí a bhaineann leis na meáin don bhliain atá le teacht, 2025.

Is féidir urraíocht a lorg d’imeachtaí agus do ghníomhaíochtaí earnáil na meán cumarsáide a thagann le haidhm an Choimisiúin chun tírdreach faoi bhláth, éagsúil, cruthaitheach agus sábháilte a chinntiú. Braitheann leibhéil an mhaoinithe a bheidh ar fáil d’iarratasóirí rathúla ar nádúr an imeachta, a ábharthacht d’obair an Choimisiúin, agus na gnéithe cur chun cinn a chuimsítear san iarratas.

Ag labhairt dó ar sheoladh bhabhta nua na Scéime Urraíochta, dúirt Rónán Ó Domhnaill, Coimisinéir Forbartha Meán Choimisiún na Meán: “Tá Coimisiún na Meán tiomanta do thacú le tírdhreach meán a léiríonn agus a mhúnlaíonn cé muid féin mar shochaí. Cuid thábhachtach dár gcuid oibre chun an cuspóir seo a bhaint amach is ea tacaíocht a thabhairt d’imeachtaí agus do ghníomhaíochtaí na meán a tharlaíonn go náisiúnta agus go háitiúil ar fud oileán na hÉireann. Tá lúcháir orm an babhta nua dár Scéim Urraíochta a sheoladh, ar deis iontach í dóibh siúd in earnáil na meán chun urraíocht a lorg le haghaidh imeachtaí agus gníomhaíochtaí a bheidh ar siúl in 2025.”

‘’Aithníonn an Scéim Urraíochta cruthaitheacht earnáil na meán cumarsáide in Éirinn agus féachtar le himeachtaí agus gníomhaíochtaí a mhaoiniú a léiríonn éagsúlacht shochaí na hÉireann. Bheadh ​​an-áthas orainn moltaí urraíochta a fheiceáil ó raon éagsúil grúpaí ar fud an oileáin faoin spriocdháta Dé Luain, 4 Samhain.”

I measc na ndaoine a fuair maoiniú ó Scéim Urraíochta Choimisiún na Meán roimhe seo tá: Fleadh Scannán na Gaillimhe, Féile Beochana an Daingin, Féile na Meán Bhéal Feirste agus Féile Idirnáisiúnta Scannán Catalyst, Duais Cheoil Rogha – a thaispeánann scoth an cheoil Ghaelaigh, agus Gradaim Chumarsáide an Oireachtais – a cheiliúrann sármhaitheas agus gnóthachtáil in earnáil na meán Gaeilge.

Is é meán lae ar an Luan, 4 Samhain 2024 an dáta deiridh chun iarratais a fháil ar an Scéim Urraíochta. Tá tuilleadh sonraí maidir le hincháilitheacht agus conas iarratas a dhéanamh ar fáil sa treoirleabhar agus san fhoirm iarratais.

Osclaíonn Coimisiún na Meán athbhreithniú ar chomhlíontacht na n-ardán ar líne le Gníomh um Sheirbhísí Digiteacha an AE

Posted on by Aoife Molloy
  • Déanann an Rialtóir beart chun a chinntiú go ndéileálann ardáin go héifeachtach le tuairiscí ar ábhar mídhleathach ar líne faoin nGníomh um Sheirbhísí Digiteacha
  • Baineann gearán amháin as gach trí cinn de sheirbhísí digiteacha a dhéantar le Coimisiún na Meán le deacrachtaí a bhaineann le ábhar mídhleathach a thuairisciú ar líne
  • Is í an chéim thosaigh bailithe faisnéise an chéad chéim i dtreo comhlíontachta agus i dtreo na gníomhaíochta forfheidhmiúcháin foirmiúla agus an imscrúdaithe a d’fhéadfadh eascairt as

    • Tá imní ar Choimisiún na Meán go bhfuil deacrachtaí ag daoine ábhar mídhleathach a thuairisciú d’ardáin ar líne. Faoin nGníomh um Sheirbhísí Digiteacha, ceanglaítear ar ardáin ar líne gníomhú ar thuairiscí ar ábhar mídhleathach de réir an dlí. Tagann imní sé seo tar éis athbhreithniú tosaigh, taobh le faisnéis a bailíodh ó Ionad Teagmhála an Choimisiúin agus gearáin a chuir rialálaithe Eorpacha eile ar aghaidh. Tá athbhreithniú foirmiúil á thionscnamh ag an gCoimisiún anois ar chórais ardán ar líne lena chinntiú go bhfuil na hardáin ag comhlíonadh a n-oibleagáidí faoi Ghníomh um Sheirbhísí Digiteacha an AE (DSA).

    Faoin DSA, ní mór d’ardáin ar líne bealaí éasca le rochtain agus éasca le húsáid a bheith acu le gur féidir le húsáideoirí ábhar mídhleathach a thuairisciú (Airteagal 16 den DSA). Ní mór pointe teagmhála soiléir agus inrochtana a bheith acu freisin le gur féidir le húsáideoirí teagmháil a dhéanamh leo (Airteagal 12). Tá Coimisiún na Meán freagrach as a chinntiú go gcloíonn gach ardán, a bhfuil a gceanncheathrú AE lonnaithe in Éirinn, leis na rialacha seo agus iad ag obair go dlúth leis an gCoimisiún Eorpach agus le rialálaithe sábháilteachta ar líne eile ar fud na hEorpa.

    Tá iarratais fhoirmiúla ar fhaisnéis eisithe ag Coimisiún na Meán anois chuig raon ardán le haghaidh tuilleadh sonraí cuimsitheacha maidir lena gcur chuige i leith roghanna tuairiscithe le haghaidh ábhar mídhleathach agus pointí teagmhála d’úsáideoirí. Nuair a bheidh an chéim bailithe faisnéise críochnaithe, rachaidh Coimisiún na Meán i dteagmháil leis na hardáin lena chinntiú go gcomhlíonann a sásraí tuairiscithe agus a bpointe teagmhála riachtanais an DSA. I gcás ina bhfuil ábhair imní ann ar fad, is féidir le Coimisiún na Meán fógra comhlíontachta a eisiúint lena n-ordófar ardáin chun aghaidh a thabhairt ar aon easnamh a shainaithnítear ina gcórais agus ina bpróisis. Mura dtagann athruithe agus feabhsuithe as sin, is féidir leis an gCoimisiún imscrúdú foirmiúil a oscailt. Má bhíonn cinneadh maidir le neamhchomhlíontacht mar thoradh ar an imscrúdú, is féidir le Coimisiún na Meán smachtbhannaí a ghearradh, mar shampla fíneáil. Is féidir leis an gCoimisiún comhaontú gealltanais atá ina cheangal de réir dlí a dhéanamh freisin le hardán, ina dtugann an t-ardán gealltanais chun a iompar a thabhairt i gcomhréir leis an dlí.

    Dúirt John Evans, Coimisinéir Seirbhísí Digiteacha ag Coimisiún na Meán, “Is dlí suntasach é an DSA atá dírithe ar thimpeallacht ar líne níos sábháilte agus níos cothroime a chruthú d’úsáideoirí. Mar sin féin, tá a éifeachtacht do shaoránaigh na hÉireann agus an AE ag brath ar chur i bhfeidhm iomlán a fhorálacha ag ardáin. As na gearáin atá faighte againn ó dhaoine in Éirinn agus ar fud na hEorpa faoi ardáin ar líne, baineann gearán amháin as gach trí chinn le fadhbanna agus ábhar mídhleathach ar líne á thuairisciú. Táimid ag déanamh idirghabhála anois lena chinntiú go gcloíonn ardáin leis na rialacha ionas gur féidir le daoine a gcearta a fheidhmiú go héifeachtach faoin DSA.”

    Dúirt Niamh Hodnett, Coimisinéir Sábháilteachta Ar Líne ag Coimisiún na Meán, “Táimid tiomanta don raon iomlán cumhachtaí atá ar fáil faoinár gCreat Sábháilteachta Ar Líne a úsáid chun ardáin a thabhairt chun cuntais as daoine a choinneáil sábháilte agus iad ar líne. Tríd an DSA, ár gCód Sábháilteachta Ar Líne atá le teacht agus Rialachán an AE maidir le hÁbhar Sceimhlitheoireachta ar Líne, táimid ag obair i dtreo tírdhreach digiteach inar féidir le daoine fásta agus leanaí dul ar líne gan eagla a bheith orthu go ndéanfaidh an t-ábhar nó an t-iompar a dtagann siad air díobháil dóibh. Nuair a fheiceann daoine ábhar mídhleathach, ba cheart dóibh é a thuairisciú don ardán ar a bhfaca siad é agus mura bhfuil siad sásta le freagra an ardáin, nó mura féidir leo bealach éasca a fháil chun an t-ábhar a thuairisciú, ba cheart dóibh teagmháil a dhéanamh linn.”

    Is iad seo a leanas na hardáin a bhfuil teagmháil á déanamh leo ag an bpointe seo:

    ArdánAirteagal 12Airteagal 16
    TikTok✓ ✓
    X✓ ✓ – i gcás nach bhfuil aon fhorluí le himscrúdú ón gCoimisiún Eorpach atá ar bun
    YouTube✓ ✓
    Meta✓ X, faoi réir imscrúdú ón gCoimisiún Eorpach atá ar bun
    LinkedIn✓ ✓
    Temu✓ ✓
    Pinterest✓ ✓
    Shein✓ X, faoi réir athbhreithniú leanúnach ón gCoimisiún Eorpach
    Etsy✓ ✓
    Dropbox✓ ✓
    Hostelworld✓ ✓
    Tumblr✓ ✓

Bronnann Coimisiún na Meán breis agus €10 milliún de mhaoiniú faoin mbabhta is déanaí denScéim Fuaim agus Fís

Posted on by Aoife Molloy

Is é an leithdháileadh nuafhógraithe, Babhta 53, an babhta maoinithe aonair is mó riamh i stair na scéime Fuaim agus Fís.

  • Tá breis agus €10.1 milliún de mhaoiniú leithdháilte i mBabhta 53, agus tá 91 tionscadal maoinithe lena n-áirítear beochan, drámaíocht, cláir faisnéise, siamsaíocht, cláir oideachasúla agus iad le bheith craolta ar an Teilifís agus ar an Raidió
  • Rinneadh 95% den mhaoiniú a leithdháileadh ar léiritheoirí neamhspleácha, agus tá 30% den mhaoiniú uilig ag dul chuig tionscadail i nGaeilge nó chuig tionscadail dhátheangacha
  • €2 mhilliún de mhaoiniú breise urraithe ag an Aire Turasóireachta, Cultúir, Ealaíon, Gaeltachta, Spóirt agus Meán chun tacú le cláir do pháistí agus daoine óga

D’fhógair Coimisiún na Meán inniu (09.09.24) go bhfuil sé le breis agus €10.1 milliún de mhaoiniú a bhronnadh faoin mbabhta is déanaí den scéim Fuaim & Fís. Mar chuid de Bhabhta 53 déanfar maoiniú ar an léiriú de 91 tionscadal don teilifís agus don raidió le léiritheoirí agus craoltóirí neamhspleácha ar fud fad na tíre. Rinneadh 95% den mhaoiniú atá mar chuid de Bhabhta 53 a chur ar fáil do léiritheoirí neamhspleácha agus tá 30% den mhaoiniú ar fad ag dul chuig tionscadail i nGaeilge nó chuig tionscadail dhátheangacha.

Dúirt Rónán Ó Domhnaill, Coimisinéir Forbartha na Meán ag Coimisiún na Meán: “Tá an scéim Fuaim & Fís i ndiaidh dul ó neart go neart, agus é ag leanúint de bheith ag maoiniú clár do lucht féachana agus do lucht éisteachta na hÉireann, agus béim á cur ar chultúr, oidhreacht agus taithí na hÉireann. Tá luachair orainn a fhógairt gurb é Babhta 53 an babhta aonair is mó riamh i stair na scéime Fuaim & Fís, agus breis agus €10.1 milliún leithdháilte ar 91 tionscadal nua don teilifís agus don raidió, lena n-áirítear beochan, drámaíocht, cláir faisnéise, siamsaíocht agus cláir oideachasúla. Ba mhaith liom buíochas a ghabháil freisin leis an Aire Catherine Martin as an leithdháileadh de €2 mhilliún de mhaoiniú breise le haghaidh clár do pháistí agus daoine óga, lena dtugtar aitheantas don ról tábhachtach atá ag páistí mar chruthaitheoirí agus mar thomhaltóirí i dtírdhreach na meán in Éirinn. Tá Fuaim & Fís fós mar fhoinse mhaoinithe ríthábhachtach le haghaidh craoltóirí agus léiritheoirí neamhspleácha, agus cuireann an scéim ar a gcumas cláir a chruthú do lucht féachana agus éisteachta, cláir nach mbeadh ann murach í.

“Cuirfidh an maoiniú ó Bhabhta 53 le mian Choimisiún na Meán tírdhreach bisiúil a fhorbairt do na meáin in Éirinn a léiríonn ilchineálacht ár muintire agus ár dtraidisiún. As na 35 léiriúchán teilifíse arna maoiniú, tá mná mar léiritheoirí in 80% acu agus tá mná mar stiúrthóirí in 54% acu. Tá muid ag súil go mór leis na tionscadail a fuair maoiniú faoin mbabhta seo den scéim Fuaim & Fís a fheiceáil agus a chloisteáil ar ár scáileáin agus ar ár n-aerthonnta.”

Ar na tionscadail atá maoinithe faoi Bhabhta 53 den scéim Fuaim agus Fís, tá:

  • Election ’24 – Tabharfaidh an comhfhiontar ar leith seo idir Tithe an Oireachtais agus an Coimisiún Toghcháin, a chraolfar ar Theilifís an Oireachtais, cuireadh don lucht féachana spléachadh taobh thiar den chuirtín le linn Olltoghcháin agus tabharfaidh sé oiliúint don lucht féachana Éireannach maidir leis an bpróiseas daonlathach.
  • First Timers on The Front Line – Leanfaidh an tsraith seo, a chraolfar ar Virgin Media Television, grúpa oiliúnaithe in aonaid oiliúna de chuid na Seirbhíse Náisiúnta Otharcharranna ar fud fad na tíre agus beidh sí in éineacht leo agus iad ar a seacht ndícheall chun beatha daoine a shábháil agus iad ag iarraidh a gcáilíochtaí a bhaint amach san am céanna.
  • John Hume san Eoraip/John Hume in Europe – Bhí John Hume ar dhuine de na figiúirí polaitiúla is mó tionchar sa 20ú haois. Ina chuid oibre chuidigh sé le ceann de na próisis síochána is rathúla ar na saolta seo a chruthú, inseofar a scéal sa chlár faisnéise dátheangach seo do TG4, agus san am céanna déanfar iniúchadh ar stair na hEorpa agus na hÉireann le leathchéad bliain anuas.
  • Mondays with Maddy – Léiriúchán do RTÉ Junior, déanfaidh an tsraith seo iniúchadh ar an gceangal croíúil atá idir Maddy, cailín fuinniúil sé bliana d’aois agus a seanathair beoga 80 bliain d’aois a bhfuil néaltrú air. Déanfar an dís seo a leanúint i ngach clár agus seal spraíúil á chaitheamh acu lena chéile.
  • Puffin Rock: Sraith 3 – Fillfidh an tsraith bheochana seo a bhfuil an iliomad duaiseanna bainte aici chuig RTÉ Junior agus cuirfidh sí fáilte roimh chuairteoirí nua agus seanchuairteoirí ar ais chuig an oileán.
  • Ours to Protect: Sraith 2 – Léireofar 2,800 uair de chláir luachmhara raidió le haghaidh éisteoirí raidió ar fud na hÉireann nuair a fhillfidh an tsraith faisnéise raidió seo faoin athrú aeráide agus gníomhú ar son na haeráide, comhfhiontar idir Craoltóirí Neamhspleácha na hÉireann agus 16 stáisiún tráchtála.
  • Don’t Ask Me to Remember – Trí leas a bhaint as an gceol, amhránaíocht agus caidreamh sóisialta déanfaidh an tsraith faisnéise raidió seo do Dublin City FM iniúchadh ar an bhfulaingt a bhaineann le Galar Alzheimer. Tagann saineolaithe leighis, teaghlaigh, cúramóirí, daoine a bhfuil an galar orthu, agus ealaíontóirí le chéile chun solas a chaitheamh ar an bhfadhb shláinte seo.
  • Finscéalta Chiarraí: Scéalta Miotasacha ón Ríocht – Cuirfidh guthanna beoga páistí áitiúla scoile an tsraith faisnéise raidió seo ar Radio Kerry i láthair i nGaeilge, sraith a thógfaidh an lucht éisteachta ar aistear draíochta trí bhéaloideas aoibhinn Chiarraí.
  • Dying to get Ripped – tabharfaidh an tsraith faisnéise seo ó Newstalk ardán d’fhir óga a bhfuil neamhoird itheacháin ag gabháil dóibh.

Tacóidh Babhta 53 le 35 tionscadal a léiriú don teilifís, €9 milliún san iomlán, agus le 56 tionscadal raidió, €1.1 milliún san iomlán. Cuireadh isteach 175 iarratas faoi Bhabhta 53 den scéim Fuaim & Fís le measúnú a dhéanamh orthu, ag lorg os cionn €21 milliún, agus rinneadh beagán os cionn €10.1 milliún de mhaoiniú a bhronnadh.

Tacóidh beagnach 30% den mhaoiniú molta (breis agus €3 mhilliún) le léiriú tograí i nGaeilge nó tograí dátheangacha, agus téann 95% den mhaoiniú (€9.6 milliún) díreach chuig an earnáil léiriúcháin neamhspleách.

Tá Babhta 53 comhdhéanta de mhaoiniú ó tháille an cheadúnais teilifíse agus €2 mhilliún de mhaoiniú arna urrú ag Catherine Martin TD, an tAire Turasóireachta, Cultúir, Ealaíon, Gaeltachta, Spóirt agus Meán, agus maoiniú á leithdháileadh ar 13 thionscadal don teilifís agus don raidió le haghaidh clár a dhíríonn ar pháistí agus ar dhaoine óga.

Spriocdháta Sínte – iarratais le haghaidh Scéimeanna nua Iriseoireachta

Posted on by Aoife Molloy

Sheol Coimisiún na Meán ár Scéimeanna nua Iriseoireachta ar 17ú Iúil 2024 a thacóidh le hearnáil na meán agus leis an iriseoireacht ar ardchaighdeán ar fud na hÉireann.

Tá síneadh ama curtha leis an spriocdháta don Scéim Tuairiscithe Daonlathais Áitiúil, An Scéim Tuairiscithe na gCúirteanna agus na Bearta Coimhdeacha. Is é 3pm, 30 Meán Fómhair an spriocdháta nua.

Le haghaidh níos mó eolais leigh: Seolann Coimisiún na Meán iarratais le haghaidh Scéimeanna nua Iriseoireachta.

Seolann Coimisiún na Meán comhairliúchán ar Chóid agus Rialacha Craolacháin athbhreithnithe

Posted on by Aoife Molloy

Nuashonruithe ar Chóid agus Rialacha Craolacháin a theastaíonn chun oibleagáidí na hÉireann a chomhlíonadh faoi Threoir an Aontais Eorpaigh maidir le Seirbhísí Meán Closamhairc (AVMSD)

Sheol Coimisiún na Meán comhairliúchán inniu (04.09.2024) ar Chóid agus Rialacha Craolacháin athbhreithnithe le haghaidh craoltóirí raidió agus teilifíse. Ní mór na Cóid agus na Rialacha a nuashonrú chun Treoir an Aontais Eorpaigh maidir le Seirbhísí Meán Closamhairc (AVMSD) a chomhlíonadh.

Forálann AVMSD do na caighdeáin íosta agus d’oibleagáidí nach mór do sholáthraithe seirbhíse meán cloí leo i réimsí éagsúla, lena n-áirítear sábháilteacht leanaí, inrochtaineacht a seirbhísí, agus an toirmeasc ar ábhar a spreagann an fuath.

Dúirt Aoife MacEvilly, Coimisinéir Craolacháin agus Físeáin ar Éileamh ag Coimisiún na Meán: “Tá sé ríthábhachtach a chinntiú go gcoinnítear na Cóid agus na Rialacha a bhaineann le craoltóirí in Éirinn cothrom le dáta le rialacháin an Aontais Eorpaigh chun tírdhreach meán atá bisiúil agus sábháilte a chinntiú do lucht féachana agus éisteachta na hÉireann. D’oscail Coimisiún na Meán comhairliúchán inniu maidir le Cóid agus Rialacha athbhreithnithe ina bhfuil oibleagáidí nuashonraithe do chraoltóirí Éireannacha agus ina n-aithnítear nós imeachta nua gearán don phobal sa chás go gcreideann aon duine gur theip ar chraoltóir Cód nó Riail a chomhlíonadh. Amach anseo, tá sé i gceist ag an gCoimisiún athbhreithniú eile a dhéanamh ar ár gCóid agus ár Rialacha lena chinntiú go leanfaidh siad orthu ag freastal ar riachtanais lucht féachana agus éisteachta na hÉireann, agus ar ár dtírdhreach meán atá ag athrú.”

Is iad seo a leanas na Cóid agus na Rialacha Craolacháin athbhreithnithe a bhfuiltear ag dul i gcomhairle fúthu:

Mairfidh an comhairliúchán ón 04 Meán Fómhair go dtí an 03 Deireadh Fómhair 2024.

Ráiteas maidir le Bagairtí Ar Líne

Posted on by Aoife Molloy

Le cúpla seachtain anuas, chonaiceamar ardú ar bhagairtí foréigin ar líne dírithe ar pholaiteoirí, pearsana poiblí, agus ar bhaill dá dteaghlaigh. Bíonn tionchar an-diúltach go deo aige seo orthu siúd a ndírítear na bagairtí orthu agus baineann sé an bonn den daonlathas. Bíonn éifeacht fhuarchúiseach ag mí-úsáid ar líne a bhíonn dírithe ar ionadaithe tofa ar an daonlathas.

Rud mídhleathach é bagairt foréigin a dhéanamh ar líne. Faoi Ghníomh um Sheirbhísí Digiteacha an Aontais, ní mór d’ardáin ar líne bealach a chur ar fáil do dhaoine chun tuairisc a thabhairt ar ábhar a mheasann siad atá mídhleathach. Ní mór d’ardáin freagairt do na tuairiscí sin go caoithiúil agus go díograiseach. Ní mór dóibh a gcuid téarmaí agus coinníollacha féin maidir le hábhar a fhorfheidhmiú go leanúnach.

Níl na cumhachtaí ag Coimisiún na Meán iallach a chur chun ábhar mídhleathach a bhaint anuas d’ardáin ar líne láithreach. Is é an ról atá againne a dhéanamh cinnte go bhfuil córais tuairiscithe ábhair na n-ardán ag obair go héifeachtach i gcomhréir leis an dlí.
Bhuaileamar le Meta faoi na bagairtí a díríodh ar an Taoiseach agus ar a theaghlach. Bhíomar i dteagmháil freisin le hionadaithe ón nGarda Síochána agus an Coimisiún Eorpach faoin eachtra sin. Táimid i mbun measúnaithe anois ar mar atá Meta ag comhlíonadh a gcuid oibleagáidí faoi Ghníomh um Sheirbhísí Digiteacha an Aontais. Beimid ag labhairt arís le Meta chun tuilleadh eolais a fháil uathu faoi na cúinsí inar tharla an eachtra sin agus faoina bhfreagra siúd ar an scéal. Smaoineoimid ar na chéad chéimeanna eile a ghlacfaimid ina dhiaidh sin. Tá raon cumhachtaí ar fáil dúinn faoinár gCreat Sábháilteachta ar Líne, ina gcuimsítear an tAcht um Rialáil Sábháilteachta ar Líne agus na Meán, Gníomh um Sheirbhísí Digiteacha an Aontais agus Rialachán an Aontais maidir le hÁbhar Sceimhlitheoireachta ar Líne.

Spriocdháta Sínte – Comhairliúcháin ar Dhréacht-Chód agus Rialacha le haghaidh Seirbhísí Físe Ar Éileamh

Posted on by Aoife Molloy

Ar 4 Iúil 2024, d’fhoilsigh Coimisiún na Meán doiciméad comhairliúcháin ar an Dhréacht-Chód agus Rialacha le haghaidh Seirbhísí Físe Ar Éileamh.

Tar éis athbhreithniú a dhéanamh ar iarratas chun síneadh a chur leis an spriocdháta, chomhaontaigh An Coimisiún ar spriocdháta nua. Is é Dé Máirt, 20 Lúnasa 2024 an spriocdháta nua le haghaidh aighneachtaí.Tá an doiciméad comhairliúcháin ar fáil ar ár suíomh gréasáin.

Seolann Coimisiún na Meán comhairliúchán maidir le Rialacha leasaithe chun Inrochtaineacht Craoltóirí Teilifíse a fheabhsú

Posted on by Aoife Molloy

Sna Dréacht-Rialacha Rochtana, tá spriocanna ceangailteacha maidir le seirbhísí Teanga Chomharthaíochta na hÉireann, Fotheidealaithe agus Tráchtaireachta Fuaime

Inniu (18.07.2024), sheol Coimisiún na Meán comhairliúchán poiblí (Bearla) ar na dréacht Rialacha Rochtana do Chraoltóirí Teilifíse (Bearla). Sna Rialacha Leasaithe, tá spriocanna ceangailteacha nuashonraithe maidir le seirbhísí Teanga Chomharthaíochta na hÉireann, Fotheidealaithe agus Tráchtaireachta Fuaime, agus dírítear sna Rialacha ar inrochtaineacht clár a fheabhsú do dhaoine faoi mhíchumas. Nuair a thabharfar na Rialacha Rochtana chun críche, beidh feidhm acu maidir le craoltóirí teilifíse atá lonnaithe in Éirinn.

Áirítear sna dréacht-Rialacha Rochtana le haghaidh comhairliúcháin Caighdeán dea-chleachtais, lena gceanglaítear ar chraoltóirí a chinntiú go dtáirgtear seirbhísí Teanga Chomharthaíochta na hÉireann, Fotheidealaithe agus Tráchtaireachta fuaime ar ardchaighdeán.

Dúirt Rónán Ó Domhnaill, Coimisinéir Forbartha na Meán ag Coimisiún na Meán: “Is príomhthosaíocht do Choimisiún na Meán é a chinntiú go gcomhlíonann tírdhreach meán na hÉireann an caighdeán is airde inrochtaineachta. Nuair a thabharfar na Rialacha Rochtana leasaithe do Chraoltóirí Teilifíse chun críche, socrófar leo spriocanna ceangailteacha nuashonraithe maidir le hinrochtaineacht seirbhísí agus cuirfear Caighdeáin le baint amach ag craoltóirí ar fáil chun a chinntiú go bhfuil a gcuid clár inrochtana. Tá Coimisiún na Meán tiomanta do thírdhreach meán na hÉireann a leasú, lena n-áirítear a chinntiú go bhforbrófar cláir le bheith cuimsitheach agus inrochtana do gach ball den lucht féachana/éisteachta.’’

Foráiltear leis na dréacht-Rialacha Rochtana freisin go bhféadfaidh daoine den phobal gearán a dhéanamh le Coimisiún na Meán i gcás ar bith nach gcomhlíonann craoltóirí na Rialacha. Beidh an comhairliúchán poiblí (Bearla) ar siúl ón 18 Iúil go dtí an 19 Lúnasa.

Mar chuid den na chomhairliúcháin, éascóidh Coimisiún na Meán cruinnithe le hEagraíochtaí Ionadaíocha um Dhaoine faoi Mhíchumas (DPROnna), daoine a úsáideann seirbhísí Fotheidealaithe, Teanga Chomharthaíochta na hÉireann agus Tráchtaireachta Fuaime agus eagraíochtaí eile a dhéanann ionadaíocht thar ceann leasanna úsáideoirí rochtana. Áiritheofar leis an gcur chuige seo go rachfar i gcomhairle leo siúd is mó a bhainfidh tairbhe as na Rialacha Rochtana agus lena n-ionadaithe sula dtabharfar na Rialacha chun críche.

• Dréacht-Rialacha Rochtana do Chraoltóirí Teilifíse (Word)
• Dréacht-Rialacha Rochtana do Chraoltóirí Teilifíse (PDF)
• Dréacht-Rialacha Rochtana do Chraoltóirí Teilifíse (ISL)
• Comhairliúchán Poiblí ar Rialacha Rochtana (Word) – Béarla
• Comhairliúchán Poiblí ar Rialacha Rochtana (PDF) – Béarla
• Comhairliúchán Poiblí ar Rialacha Rochtana (ISL)
• Foirm Comhairliúchán Poiblí ar Rialacha Rochtana (Word) – Béarla

Seolann Coimisiún na Meán iarratais le haghaidh Scéimeanna nua Iriseoireachta

Posted on by Aoife Molloy

Tacóidh na Scéimeanna nua Tuairiscithe Daonlathais Áitiúil agus Cúirteanna le hiriseoireacht phoiblí inrochtana d’ardchaighdeán a chruthú
Leithdháileadh €6 mhilliún ar na Scéimeanna Iriseoireachta in 2024

Sheol Coimisiún na Meán ár Scéimeanna nua Iriseoireachta inniu (17.07.2024) a thacóidh le hearnáil na meán agus leis an iriseoireacht ar ardchaighdeán ar fud na hÉireann. Is é aidhm na Scéimeanna an clúdach a dhéantar ar údaráis áitiúla agus ar éisteachtaí na cúirte dúiche agus cuarda a fheabhsú agus bunaíodh iad tar éis moladh a rinneadh i dTuarascáil de chuid Choimisiún um Thodhchaí na Meán.

Cuirfear maoiniú ar fáil freisin le haghaidh tograí iriseoireachta is spéis leis an bpobal i bhfoirm fhada. Sa chomhthéacs sin, beidh maoiniú ar fáil chun cúnamh a thabhairt do sholáthraithe seirbhíse meán píosaí nó sraith fócais dhomhain a dhéanamh faoi réimse leathan saincheisteanna a eascraíonn as an gclúdach ar na húdaráis áitiúla/fóraim dhaonlathacha eile nó a eascraíonn as clúdach ar na cúirteanna nó ábhair ghaolmhara.

Leithdháileadh €6 mhilliún ar na Scéimeanna Iriseoireachta in 2024 a bhuíochas le mhaoiniú a d’éirigh leis an Aire Turasóireachta, Cultúir, Ealaíon, Gaeltachta, Spóirt agus Meán, Catherine Martin TD, a bhaint amach. Cumhdaítear leis an maoiniú sin deontais agus costais riaracháin na Scéime.

Beidh na Scéimeanna nua Iriseoireachta oscailte d’iarratais ó iriseoirí agus ó eagraíochtaí meán, lena n-áirítear ardáin chraolta, chlóite agus ar líne, i nGaeilge agus i mBéarla araon. Le bheith incháilithe, iarrfar ar iarratasóirí saineolas, cumas agus cuntas teiste eagarthóireachta a léiriú, agus ní mór freisin gur eintiteas rialáilte iad, nó ní mór dóibh a bheith cleamhnaithe le heintiteas rialáilte.

Ag trácht dó ar sheoladh na Scéimeanna Iriseoireachta, dúirt Rónán Ó Domhnaill, Coimisinéir Forbartha na Meán ag Coimisiún na Meán: “Tá ríméad orainn a bheith ag seoladh ár Scéimeanna Iriseoireachta tuairiscithe daonlathais áitiúil agus cúirteanna. Seo é an chéad deis atá ag Coimisiún na Meán tacaíocht dhíreach a thairiscint chun iriseoireacht iontaofa d’ardchaighdeán a chur chun cinn do phobail áitiúla ar fud na hÉireann agus é sin a dhéanamh ar bhonn ardáin-neodraigh. Seo é an chéad uair ar féidir tacú le soláthraithe nuachta clóite agus ar líne ar an mbealach seo.”

“Tá na Scéimeanna nua seo á dtabhairt isteach ar bhonn píolótach agus déanfar athbhreithniú orthu ina dhiaidh sin, agus beidh an t-aiseolas a gheofar agus rannpháirtíocht na bpáirtithe leasmhara fíorthábhachtach d’fhorbairt aon tionscnaimh agus scéimeanna maoinithe amach anseo. Molaimid do gach iarratasóir incháilithe iarratas a dhéanamh ar mhaoiniú agus táimid ag tnúth le haiseolas a fháil ar chur i bhfeidhm na Scéimeanna nua seo.”

Dúirt an tAire Turasóireachta, Cultúir, Ealaíon, Gaeltachta, Spóirt agus Meán, Catherine Martin TD: “Cuirim fáilte mhór roimh sheoladh na Scéimeanna Tuairiscithe Cúirteanna agus Daonlathais Áitiúil ag Coimisiún na Meán inniu. Tá earnáil meáin láidir, éagsúil agus saor, a bhfuil nuacht áitiúil agus réigiúnach ina cuid ríthábhachtach de, riachtanach don daonlathas agus dár sochaí ina hiomláine. Tá na Scéimeanna ina n-imeacht nua ag an Stát chun tacú le hiriseoireacht chun leasa an phobail ag am a bhfuil iriseoireacht thraidisiúnta faoi bhrú.

Cabhróidh an €6m a fuair mé i mBuiséad 2024, ar mhaithe leis na Scéimeanna nua, le tacú le hiriseoireacht ardchaighdeáin neamhspleách chun leasa an phobail a sholáthraíonn seirbhís riachtanach don phobal chomh maith le hiolrachas, inbhuanaitheacht agus sláine ár meán.”

Cuirfear an t-ábhar ar fad a mhaoineofar ar fáil in aisce don phobal, 7 lá ar a laghad tar éis é a fhoilsiú den chéad uair, agus uaslódálfaidh Coimisiún na Meán é ar a shuíomh gréasáin, .

Tagann seoladh na Scéimeanna i ndiaidh comhairliúcháin phoiblí i mí Aibreáin na bliana seo, agus tarraingíodh aird in go leor aighneachtaí a rinneadh chuig an gcomhairliúchán ar thábhacht na Scéimeanna chun daonlathas sláintiúil a chothú, eolas a thabhairt do shaoránaigh agus iad a dhéanamh rannpháirteach. Léiríodh sna freagraí freisin go raibh na freagróirí sásta ar an iomlán leis an gcur chuige a mhol an Coimisiún.

Iarrann Coimisiún na Meán anois ar iarratasóirí iarratas a dhéanamh ar mhaoiniú faoi na Scéimeanna nua Iriseoireachta píolótacha. Is féidir na Treoir d’Iarratasóirí a fháil anseo:
• An Scéim Tuairiscithe Daonlathais Áitiúil (Béarla)
• An Scéim Tuairiscithe Daonlathais Áitiúil (Gaeilge)
• Scéim Tuairiscithe na gCúirteanna (Béarla)
• Scéim Tuairiscithe na gCúirteanna (Gaeilge)

Is é 12.00, an 17 Meán Fómhair 2024 an dáta deiridh a nglacfar le hiarratais chomhlánaithe don dá Scéim. Is féidir na foirmeacha iarratais a fháil anseo:
• An Scéim Tuairiscithe Daonlathais Áitiúil – Foirm Iarratais (Béarla)
• An Scéim Tuairiscithe Daonlathais Áitiúil – Foirm Iarratais (Gaeilge)
• An Scéim Tuairiscithe Daonlathais Áitiúil – Beart Coimhdeach (Béarla)
• An Scéim Tuairiscithe Daonlathais Áitiúil – Beart Coimhdeach (Gaeilge)
• Scéim Tuairiscithe na gCúirteanna – Foirm Iarratais (Béarla)
• Scéim Tuairiscithe na gCúirteanna – Foirm Iarratais (Gaeilge)
• Scéim Tuairiscithe na gCúirteanna – Beart Coimhdeach (Béarla)
• Scéim Tuairiscithe na gCúirteanna – Beart Coimhdeach (Gaeilge)

Is féidir tuilleadh eolais a fháil faoi na Scéimeanna ar ár suíomh gréasáin anseo.