Le leithdháileadh Bhabhta 54 tacaítear le hábhar a tháirgeadh a dhíríonn ar ghuthanna na bpobal nua in Éirinn.
- Tá breis agus €3.9 milliún de mhaoiniú leithdháilte i mBabhta 54, agus tá 35 thionscadal maoinithe, lena náirítear cláir drámaíochta, faisnéise, siamsaíochta, agus oideachasúla, agus iad le craoladh ar an Teilifís agus ar an Raidió
- Rinneadh 97% den mhaoiniú a leithdháileadh ar léiritheoirí neamhspleácha, agus tá €1.4 milliún den mhaoiniú uilig ag dul chuig tionscadail i nGaeilge nó chuig tionscadail dhátheangacha
- Tá €2 mhilliún de mhaoiniú breise urraithe ag an Aire Turasóireachta, Cultúir, Ealaíon, Gaeltachta, Spóirt agus Meán chun tacú le hábhar a dhíríonn ar ghuthanna na bpobal inimirceach agus nua in Éirinn.
D’fhógair Coimisiún na Meán inniu (14.11.24) go bhfuil sé le breis agus €3.9 milliún de mhaoiniú a bhronnadh faoin mbabhta is déanaí den scéim Fuaim agus Fís. Mar chuid de Bhabhta 54 déanfar maoiniú ar an léiriú de 35 thionscadal don teilifís agus don raidió le léiritheoirí agus craoltóirí neamhspleácha fud fad na tíre. Rinneadh 97% den mhaoiniú atá mar chuid de Bhabhta 54 a chur ar fáil do léiritheoirí neamhspleácha agus tá €1.4 milliún den mhaoiniú ar fad ag dul chuig tionscadail i nGaeilge nó chuig tionscadail dhátheangacha.
Dúirt Rónán Ó Domhnaill, Coimisinéir Forbartha na Meán ag Coimisiún na Meán an méid seo a leanas: “Tá Coimisiún na Meán tiomanta d’éagsúlacht agus iolracht ábhair a chinntiú, ábhar ina léirítear muintir na hÉireann, lena náirítear a dteangacha, a dtraidisiúin, agus a néagsúlacht reiligiúnach agus chultúrtha. Tá lúcháir orainn go bhfuil an deis againn tacú le tionscadail a chuireann an éagsúlacht sin in iúl. Leis an mbabhta seo den Scéim Fuaim agus Fís, cuirfear le tuiscint an phobail agus féachfar ar an taithí ar leith agus na luachanna cultúrtha atá ag na pobail nua in Éirinn, fad a chuirfear raon leathan ábhair ar ardchaighdeán, atá ábhartha ó thaobh cultúir de, ar fáil.
Ba mhaith liom buíochas a ghabháil freisin leis an Aire Catherine Martin as an leithdháileadh €2 mhilliún de mhaoiniú breise. Tá Fuaim agus Fís ina fhoinse mhaoinithe ríthábhachtach le haghaidh craoltóirí agus léiritheoirí neamhspleácha fós, agus cuireann an scéim ar a gcumas cláir a chruthú do lucht féachana agus éisteachta, cláir nach mbeadh ann murach í.”
Ar na tionscadail atá maoinithe faoi Bhabhta 54 den scéim Fuaim agus Fís, tá:
- Welcome to Moore Street – Sa tsraith seo, atá le craoladh ar RTÉ a hAon, léirítear croí na hÉireann nua-aimseartha, áit nach bhfuil rudaí ‘dubh agus bán’. Ní bhaineann an tsraith seo le hinimirce, ach tugann sé léargas spéisiúil ar bheatha na nÉireannach, idir ‘shean’ agus ‘nua’, a bhíonn ag streachailt lena mbeatha a shaothrú anseo ar an taobh thuaidh de lár na cathrach i mBaile Átha Cliath.
- My Ireland Too – Sa tsraith faisnéise seo, atá le craoladh ar Virgin Media Television, téann iarrthóirí tearmainn agus imircigh óga i gceantar Chorcaí i ngleic leis na dúshláin a bhaineann le saol nua a thosú le linn méadú bagrach ar leithcheal agus ciníochas, agus cuirtear in iúl radharc ionraic agus iontaofa ar eispéireas na nimirceach in Éirinn.
- Bia Úr – Sa tsraith faisnéise TG4 seo, cuirtear cultúir agus traidisiúin maidir le bia nua agus spéisiúil i láthair an lucht féachana trí scéalta faoi dhaoine atá ag cur fúthu in Éirinn.
- Mo Shaol, Do Shaol – Sna trí eipeasóid déag den tsraith shiamsaíochta seo do leanaí, atá ar fáil ar Cúla4 den 4ú huair, faigheann breathnóirí óga blaiseadh de na príomhimeachtaí a cheiliúrann na pobail nua in Éirinn.
- Joy to the World – Ceiliúrann an tsraith faisnéise raidió seo, atá ar KCLR 96FM, an Nollaig le pobail imirceach agus nua in Éirinn; glactar páirt ina gcuid traidisiún, ceoil, ullmhúchán, maisiúchán, bia agus i malartú bronntanas.
- Mmanwu – Sa drámaíocht raidió seo, atá le craoladh ar Newstalk, déantar scrúdú ar na castachtaí a bhaineann leis an máithreachas, le meabhairshláinte, agus leis an gcodarsnacht idir an traidisiún agus an nua-aimsearthacht i gcomhthéacs bríomhar Bhaile Átha Cliath agus Onitsha, an Nigéir.
- Voices of New Ireland – Pléann an tsraith seo, atá le craoladh ar Flirt FM i dtrí eipeasóid déag, le hoidhreacht chultúrtha, leis an nGaeilge, le hoideachas agus leis na healaíona, i measc téamaí eile, agus béim á cur ar éachtaí an phobail agus imeascadh trí chultúir éagsúla a mhúnlaíonn Éire na linne seo.
Cuireadh isteach 44 iarratas, a bhí ag lorg os cionn €4.3 milliún, faoi Bhabhta 54 den scéim Fuaim agus Fís, agus bronnadh beagán os cionn €3.9 milliún de mhaoiniú.
Tacóidh beagnach 35% den mhaoiniú molta le léiriú tograí i nGaeilge nó tograí dátheangacha, agus tá tograí ann a bhaineann le raon teangacha éagsúla eile mar gheall ar aidhm an Bhabhta. Téann 97% den mhaoiniú (breis is €3.8 milliún) díreach chuig an earnáil léiriúcháin neamhspleách. Tá Babhta 54 comhdhéanta de mhaoiniú ó tháille an cheadúnais teilifíse agus €2 mhilliún de mhaoiniú arna urrú ag Catherine Martin TD, an tAire Turasóireachta, Cultúir, Ealaíon, Gaeltachta, Spóirt agus Meán.
