Treoirlínte Comhairliúcháin

Faoi fhorálacha áirithe de na hAchtanna um Rialáil Craolacháin agus Meán Eile, 2009 agus 2022, ceanglaítear ar Choimisiún na Meán, nó ceadaítear dó, dul i gcomhairle leis an bpobal nó le comhlachtaí éagsúla sula ndéantar cinntí. Baineann na forálacha sin le comhairliúcháin maidir le rialacháin ghinearálta, amhail cóid seirbhíse meán a ghlacadh nó cód sábháilteachta ar líne a chur i bhfeidhm maidir le catagóir seirbhísí. Baineann siad freisin le comhairliúcháin le heintitis aonair i gcás ina ndéanfaidh cinneadh atá beartaithe difear d’eintiteas, amhail cód sábháilteachta ar líne a chur i bhfeidhm maidir lena sheirbhís.

I gcás ina gceanglaítear ar Choimisiún na Meán nó ina gceadaítear dó próiseas comhairliúcháin phoiblí a sheoladh le linn dó a fheidhmeanna rialála a chomhlíonadh, féadfaidh sé déanamh amhlaidh i gcomhréir leis na nósanna imeachta comhairliúcháin a leagtar amach sna treoirlínte seo.

Is éard atá sna treoirlínte sin ráiteas ginearálta maidir leis na prionsabail is infheidhme. Tá Coimisiún na Meán go hiomlán i dteideal imeacht ó na nósanna imeachta a leagtar amach sna treoirlínte seo, i gcás ina gcreideann sé, agus a lánrogha á feidhmiú aige, go mbeadh imeacht den sórt sin oiriúnach sna himthosca ar leith.

Níl feidhm ag na nósanna imeachta sin maidir le comhairliúchán le comhlachtaí poiblí eile nó le coistí comhairleacha. Níl feidhm acu ach oiread maidir le cumarsáidí le linn fiosrúcháin chomhlíontachta nó imeachtaí forfheidhmiúcháin.

Prionsabail chomhairliúcháin

Is é cuspóir an chomhairliúcháin faisnéis a sholáthar ar ábhar an chomhairliúcháin agus deis a thabhairt do pháirtithe leasmhara aighneachtaí a dhéanamh. Níl sé beartaithe go rachadh sé in áit na cinnteoireachta ach léiríonn sé go mbaineann an próiseas cinnteoireachta tairbhe as an raon is leithne tuairimí agus an fhaisnéis is iomláine a bheith aige ar shaincheist ar leith. Tugann sé deis freisin d’eintitis aonair a leagan amach conas a rachaidh cinneadh beartaithe i bhfeidhm orthu, rud a éascaíonn cinnteoireacht chomhréireach.

Tá Coimisiún na Meán tiomanta go hiomlán do phróiseas comhairliúcháin trédhearcach agus aithníonn sé gur féidir ceapadh beartais phoiblí a fheabhsú trí rannpháirtíocht ghníomhach agus rannchuidiú gníomhach na bpáirtithe leasmhara a bhfuil spéis acu i bhforbairtí beartais ar leith. Trína chinntiú gur féidir le páirtithe leasmhara a dtuairimí a chur in iúl maidir le togra ar leith, éiríonn an próiseas cinnteoireachta níos eolaí, níos déine agus níos cuntasaí.

Ba cheart a thabhairt faoi deara nach bhfuil Coimisiún na Meán faoi cheangal dlí ag a dhoiciméid chomhairliúcháin agus nach ionann iad agus comhairle dhlíthiúil, tráchtála, airgeadais, theicniúil nó comhairle eile nó gur gá go leagfadh sé amach seasamh críochnaitheach, cinntitheach Choimisiún na Meán maidir le haon ábhar ar leith.

Sula dtionscnaítear próiseas comhairliúcháin, féadfaidh Coimisiún na Meán dul i dteagmháil le páirtithe leasmhara chun cabhrú leis saincheisteanna a shainaithint agus tograí a cheapadh. Ní féidir réamh-rannpháirtíocht le páirtithe leasmhara a chur in áit próiseas comhairliúcháin, ach féadfaidh Coimisiún na Meán í a úsáid chun bonn eolais a chur faoin bpróiseas sin.

Doiciméid chomhairliúcháin a fhoilsiú

Sa chás go reáchtálann Coimisiún na Meán comhairliúchán poiblí, cuirfear gach doiciméad comhairliúcháin ar fáil ar ár suíomh gréasáin. Is féidir fógraí a phostáil ar ár gcuntais meán sóisialta freisin agus iad a sheoladh trí ríomhphost chuig daoine atá cláraithe linn chun fógraí faoi fhoilseacháin a fháil. Seolfar fógraí freisin chuig aon duine a bhfuil dualgas reachtúil ar Choimisiún na Meán dul i gcomhairle leis.  Beidh cóipeanna crua agus formáidí inrochtana eile de dhoiciméid chomhairliúcháin ar fáil arna iarraidh sin. Nuair a cheanglaítear amhlaidh leis an dlí, cuirfear doiciméid chomhairliúcháin ar fáil freisin lena n-iniúchadh.

Féadfaidh Coimisiún na Meán bearta breise a dhéanamh chun aird na bpáirtithe a mheasann sé a bhféadfadh suim a bheith acu i gcomhairliúchán ar leith a tharraingt ar an gcomhairliúchán. Mar sin féin, tá sé de fhreagracht ar pháirtithe ar dóigh dóibh spéis a bheith acu i gcomhairliúcháin Choimisiún na Meán clárú le haghaidh fógraí, agus suíomh gréasáin agus cuntais meán sóisialta Choimisiún na Meán a sheiceáil le haghaidh comhairliúcháin ar mian leo freagra a thabhairt orthu.

Maidir le comhairliúcháin le heintitis aonair, tabharfaidh Coimisiún na Meán fógra díreach do na heintitis sin faoi na doiciméid chomhairliúcháin.

Áireofar sna doiciméid chomhairliúcháin an dáta deiridh chun aighneachtaí a fháil agus duine teagmhála laistigh de Choimisiún na Meán. I gcás inarb iomchuí nó ina gceanglaítear sin leis an dlí, áireofar sna doiciméid chomhairliúcháin dréacht-togra nó dréachtchinneadh a bheidh mar bhonn leis an gComhairliúchán. Féadfaidh siad cur síos a thabhairt freisin ar an mbeart atá beartaithe agus ar na tosca a mheasann Coimisiún na Meán a bheith ábhartha don cheist.

Tréimhse chomhairliúcháin

De ghnáth, is ceithre seachtaine a bheidh sa tréimhse ama a cheadaítear do pháirtithe leasmhara freagra a thabhairt ar chomhairliúchán, ach d’fhéadfadh sé sin a bheith éagsúil i gcásanna áirithe mar gheall ar thosca amhail:

• práinn an ábhair
• castacht na saincheisteanna
• na páirtithe leasmhara ar dóigh dóibh aighneachtaí a dhéanamh
• líon na ndoiciméad nach mór aghaidh a thabhairt orthu
• aon cheanglas reachtúil maidir le huainiú
• Amchlár Laethanta Saoire Poiblí
• acmhainní a shlógadh chun déileáil leis na saincheisteanna a tarraingíodh anuas.

Sa chás go molann Coimisiún na Meán tréimhse ama níos giorra ná ceithre seachtaine chun freagra a thabhairt ar chomhairliúchán, tabharfaimid cúiseanna leis sin a dhéanamh.

In imthosca eisceachtúla, féadfaidh Coimisiún na Meán, dá lánrogha féin, breithniú a dhéanamh ar shíneadh a chur leis an tréimhse chomhairliúcháin, má iarrann páirtí leasmhar air déanamh amhlaidh. Ba cheart aon iarraidh ar shíneadh ama a dhéanamh laistigh de sheachtain amháin ó dháta foilsithe an chomhairliúcháin lena mbaineann. I gcás ina gcinneann Coimisiún na Meán síneadh a chur leis an tréimhse chomhairliúcháin, cuirfimid páirtithe leasmhara ar an eolas go poiblí trínár suíomh gréasáin agus féadfaimid fógra a thabhairt freisin trí chuntais meán sóisialta agus trí ríomhphost do na daoine sin atá cláraithe chun fógraí a fháil.

Aighneachtaí

Cuirtear fáilte roimh aighneachtaí maidir le comhairliúcháin phoiblí ó gach duine leasmhar, lena n-áirítear úsáideoirí agus soláthraithe seirbhísí, agus grúpaí na sochaí sibhialta.

Beidh treoracha i ngach doiciméad comhairliúcháin maidir le conas aighneachtaí a sheoladh chuig Coimisiún na Meán. Ba chóir tuairimí a chur ar fáil i scríbhinn i bhformáid leictreonach le rochtain léite/scríofa ach glacfar le tuairimí a chuirtear ar fáil tríd an bpost nó de láimh freisin.

Chun cabhrú le Coimisiún na Meán breithniú ceart a dhéanamh ar gach aighneacht a fhaightear, moltar do pháirtithe leasmhara aighneachtaí a dhéanamh ar bhealach a chloíonn go dlúth le formáid an doiciméid chomhairliúcháin. Leagfaidh Coimisiún na Meán amach teorainneacha ar na haighneachtaí a bhreithneofar i ngach doiciméad comhairliúcháin.

Forchoimeádann Coimisiún na Meán a theidlíocht go hiomlán gan aon aighneachtaí nach gcomhlíonann na srianta infheidhme a bhreithniú.

Aighneachtaí a fhoilsiú

Is é beartas Choimisiún na Meán gach aighneacht chuig comhairliúcháin phoiblí a fhoilsiú. Ba cheart aighneachtaí a sholáthar mar dhoiciméid neamhrúnda, mar aon le haon fhaisnéis a n-éilítear rúndacht ina leith (e.g. faisnéis atá íogair ó thaobh na tráchtála de) a sholáthraítear in aguisín ar leithligh; de rogha air sin, féadfar leagan folaithe neamhrúnda a chur isteach in éineacht leis an leagan rúnda. Ní fhoilseofar aon doiciméad atá marcáilte faoi rún ar an mbealach sin. Ní bheidh Coimisiún na Meán faoi dhliteanas, áfach, i leith aon doiciméid a nochtar ina dhiaidh sin de bhun iarratais faoin Acht um Shaoráil Faisnéise, 2014 nó ar shlí eile de réir dlí.

Rannpháirtíocht iarchomhairliúcháin

De ghnáth, ní bhreithneoidh Coimisiún na Meán ach freagraí i scríbhinn amháin agus ní thabharfaidh sé deis do fhreagróirí uiríll ó bhéal a dhéanamh.

Má tá beart molta dírithe ar eintiteas aonair, breithneoidh Coimisiún na Meán cé acu atá nó nach bhfuil gá le huiríll ó bhéal ón soláthraí aonair mar chuid den phróiseas. Féadfaidh Coimisiún na Meán, dá rogha féin, nótaí cruinnithe a fhoilsiú ina ndéantar achoimre ar na cruinnithe le soláthraithe aonair, arna bhfolú de réir mar is iomchuí chun faisnéis rúnda a eisiamh.

Tuarascáil chomhairliúcháin

Cuirfidh Coimisiún na Meán na haighneachtaí a dhéantar san áireamh. Ba cheart a thabhairt faoi deara, áfach, nach ionann an próiseas agus cleachtadh vótála ar thograí agus feidhmeoidh Coimisiún na Meán a bhreithiúnas tar éis breithniú a dhéanamh ar na haighneachtaí a rinneadh. Déanfaidh Coimisiún na Meán a thuairimí féin go neamhspleách ar thuairimí aon chomhairlithe ar leith.

Foilseoidh Coimisiún na Meán tuarascáil chomhairliúcháin tar éis gach próisis chomhairliúcháin. Aithnítear go bhféadfadh raon leathan páirtithe leasmhara a bheith ann maidir le haon saincheist ar leith. Leagfaidh Coimisiún na Meán amach na príomhcheisteanna atá ag teacht chun cinn agus na príomhphointí ar glacadh leo, chomh maith leis na príomhphointí nach bhféadfaí a chur san áireamh ar chúiseanna praiticiúla, dlíthiúla nó beartais. Féadfaidh Coimisiún na Meán a chinneadh an beart a ndeachthas i gcomhairle leis a ghlacadh, le leasú nó gan leasú.