Ábhar díobhálach ar na hardáin uile
Tá dualgas dlí ar na hardáin mheán sóisialta is mó anois faoin gCreat Sábháilteachta ar Líne a rialacha a bheith acu maidir le hábhar inghlactha agus ní mór dóibh na rialacha sin a chur san áireamh ina gcuid téarmaí agus coinníollacha, nó ina gcuid rialacha pobail. Caithfidh siad na rialacha seo a fhorfheidhmiú chomh maith. Soláthraíonn siad uile córais d’úsáideoirí chun ábhar a mheasann siad mar shárú ar na rialacha a thuairisciú.
Ligeann roinnt ardán ar líne d’úsáideoirí mífhaisnéis nó bréagaisnéis a thuairisciú. É sin ráite, ní gá i gcónaí go mbeadh mífhaisnéis nó bréagaisnéis neamhdhleathach, mar sin, ní bhainfidh na dualgais maidir le hábhar neamhdhleathach le mífhaisnéis nó bréagaisnéis ach amháin má tá an t-ábhar neamhdhleathach ar chúis éigin eile.
Bíonn dualgas ar na hardáin mhóra meán sóisialta réimse baol a d’fhéadfadh a bheith i gceist lena seirbhísí a mheas. Áirítear leis seo baol do dhioscúrsa sibhialta agus próisis toghcháin, do shláinte an phobail nó do shlándáil an phobail. Bíonn orthu bearta a chur i bhfeidhm freisin leis na baoil sin a mhaolú. Clúdóidh an próiseas seo freisin baoil a d’fhéadfadh a bheith ann mar gheall ar roinnt cineálacha mífhaisnéise agus bréagaisnéise.
Tá sé de chúram ar an gCoimisiún Eorpach measúnú a dhéanamh ar shásúlacht na measúnuithe baol agus na mbeart maolaithe, lena n-áirítear iad siúd a dhíríonn ar an mífhaisnéis agus ar an mbréagaisnéis.
Níl an t-údarás ag Coimisiún na Meán ná ag aon chomhlacht poiblí eile ceangal a leagan síos gur gá ábhar a bhaint, mura bhfuil i gceist leis an mbonn ach gur mífhaisnéis nó bréagaisnéis atá san ábhar.
Le haghaidh faisnéis mhionsonrach ar chórais ghearáin dá bhforáiltear faoin Acht um Sheirbhísí Digiteacha, téigh go dtí ár leathanach tiomnaithe treoir maidir le gearáin.
Ábhar díobhálach ar ardáin comhroinnte físeán
Ceanglaítear ar ardáin comhroinnte físeán atá bunaithe in Éirinn úsáideoirí a chosaint ar ábhar físeáin díobhálach, lena náirítear ábhar físeáin:
- a d’fhéadfadh díobháil a dhéanamh d’fhorbairt fhisiciúil, mheabhrach nó mhorálta leanaí, nó
- ina bhfuil gríosú chun fuatha nó foréigin.
Tá sé de cheangal orthu freisin úsáideoirí a chosaint ar chumarsáid tráchtála chlosamhairc dhíobhálach (fógraíocht físeáin), agus a chinntiú:
- go bhfuil fógraí físeáin so-aitheanta,
- nach núsáideann fógraí físeáin teicnící fothairseachúla,
- nach ndéanann fógraí físeáin díobháil do dhínit an duine, nach bhfuil leithcheal iontu ná nach gcuireann siad leithcheal chun cinn, nach spreagann siad díobháil don tsláinte ná don tsábháilteacht, ná nach spreagann siad díobháil don chomhshaol,
- nach bhfógraíonn fógraí físeáin toitíní, táirgí tobac eile, toitíní leictreonacha agus coimeádáin athlíonta, cógais ar oideas nó táirgí íocshláinte,
- nach bhfuil fógraí físeáin le haghaidh alcóil dírithe ar leanaí, agus nach spreagtar iontu an ró-ólachán, agus
- nach ndéanann fógraí físeáin díobháil fhisiciúil, mheabhrach nó mhorálta do leanaí.
Ceanglaítear ar ardáin comhroinnte físeán córais tuairiscithe agus mharcála a bheith i bhfeidhm acu ionas gur féidir le húsáideoirí na cineálacha díobhálacha ábhair físeáin sin a thuairisciú dóibh nó bratach a chur leo. Ní mór d’ardáin comhroinnte físeán insint do na húsáideoirí an méid atá déanta acu tar éis thuairisciú an ábhair físeáin nó tar éis bratach a chur leis.
Ina theannta sin, ní mór d’ardáin comhroinnte físeán córais láimhseála gearán a sholáthar ionas gur féidir le húsáideoirí gearán a chur chucu maidir leis an gcaoi a bhfuil na córais tuairiscithe agus mharcála curtha chun feidhme acu.
Má tá buairt ort i dtaobh ábhar físeáin nó fógraíocht físeáin atá feicthe agat ar ardán comhroinnte físeán, ba cheart duit an tábhar a thuairisciú don ardán nó bratach a chur leis ar an ardán ar dtús.
Is féidir leat teagmháil a dhéanamh le hIonad Teagmhála Choimisiún na Meán (ar + 353 1 963 7755 nó ag usersupport@cnam.ie) agus eolas agat maidir le hábhar físeáin díobhálach nó fógraíocht físeáin dhíobhálach. Is féidir linn an teolas sin a úsáid chun tuiscint níos fearr a fháil ar an gcaoi a bhfuil ardáin comhroinnte físeán ag comhlíonadh a gcuid dualgas faoin gCreat Sábháilteachta ar Líne.
