Cad iad na hoibleagáidí a bhaineann liomsa?

Is é is aidhm do na hoibleagáidí úsáideoirí ar líne a chosaint agus timpeallacht ar líne atá sábháilte, intuartha agus iontaofa a chruthú

Ar an gcéad dul síos, beidh ort a chinneadh cé acu de na ceithre chatagóir lena mbaineann do ghnólacht, ag tabhairt faoi deara go bhféadfadh eintiteas amháin a sholáthraíonn seirbhísí iomadúla a bheith i níos mó ná catagóir amháin.

Ní oibleagáidí uileghabhálacha iad na hoibleagáidí thíos, féach pacáiste na hIonstraime um Sheirbhísí Digiteacha chun forléargas mionsonraithe a fháil ar an Ionstraim um Sheirbhísí Digiteacha.

An bhfuil feidhm ag an DSA maidir le mo ghnólacht?

Catagóirí Soláthraithe Seirbhíse Idirghabhálacha

Catagóir 1: Soláthraithe Seirbhísí Idirghabhálacha

Baineann sé le heagraíochtaí a sholáthraíonn seirbhísí arb é atá iontu seirbhís ‘cainéil fhóraigh’, seirbhís ‘thaiscthe’ nó seirbhís ‘óstála’. Is fothacair de Chatagóir 1 seo iad Catagóirí 2-4. 

Catagóir 2: Soláthraithe Seirbhísí Óstála

Is soláthraithe seirbhísí idirghabhálacha iad seirbhísí óstála a stórálann faisnéis arna soláthar ag faighteoir na seirbhíse, agus arna iarraidh sin d’fhaighteoir na seirbhíse. 

Catagóir 3: Ardáin ar Líne

Is éard is ‘Ardáin ar Líne’ ann seirbhísí óstála a stórálann agus a scaipeann faisnéis ar an bpobal, arna iarraidh sin d’fhaighteoir na seirbhíse (mura mionghné agus gné choimhdeach amháin de sheirbhís eile nó mionfheidhmiúlacht de chuid na príomhsheirbhíse atá sa ghníomhaíocht sin agus, ar chúiseanna teicniúla agus oibiachtúla, nach féidir a úsáid gan an tseirbhís eile sin, agus nach bealach é comhtháthú na gné nó na feidhmiúlachta sin sa tseirbhís eile le dul timpeall ar infheidhmeacht an DSA).

Catagóir 4: Ardáin an-mhór ar Líne agus Innill Chuardaigh an-mhór ar Líne

Ardáin an-mhór ar Líne (VLOPanna): Is ardáin ar líne iad VLOPanna a bhfuil 45 milliún nó níos mó d’fhaighteoirí gníomhacha míosúla na seirbhíse acu san Aontas (arb ionann iad agus 10% de dhaonra an Aontais).  

Innill Chuardaigh an-mhór ar Líne (VLOSEnna): Is innill chuardaigh iad VLOSEnna a bhfuil 45 milliún nó níos mó d’fhaighteoirí gníomhacha míosúla na seirbhíse acu san Aontas (arb ionann iad agus 10% de dhaonra an Aontais).

Oibleagáidí ar gach Soláthraí Seirbhíse Idirghabhála (catagóirí 1, 2, 3, 4)

• Modh a chur ar fáil d’úsáideoirí chun iarrataí a chur isteach maidir le hábhar mídhleathach a bhaint anuas. Ba cheart go n-áireofaí leis seo treoracha maidir le conas é seo a dhéanamh.
• Faisnéis maidir le sásraí sásaimh a sholáthar d’úsáideoirí a bhfuil a n-ábhar faoi réir aon chineál sriain, baint anuas, nó iarraidh ar bhaint anuas, lena n-áirítear cúis ar baineadh an t-ábhar.
• Pointe teagmhála aonair a chur ar fáil chun cumarsáid a dhéanamh le Coimisiún na Meán, leis an gCoimisiún Eorpach agus leis an mBord Eorpach um Sheirbhísí Digiteacha. 
• Téarmaí agus coinníollacha a dhéanamh poiblí, inrochtana, agus a chur ar fáil i dteanga shimplí. Ba cheart sonraí maidir le beartais, próisis agus foirne modhnóireachta a áireamh sna téarmaí agus coinníollacha sin. 
• Tuarascálacha trédhearcachta a fhoilsiú lena n-áireofar sonraí seirbhíse, gearáin faoi fhógraí agus faoi ghníomhartha, téarmaí gearán seirbhíse, aighneachtaí ábhair mhídhleathaigh, agus orduithe chun faisnéis a sholáthar. Ba cheart go n-áireofaí orthu sin logaí comharthaí ó chomharthóirí iontaofa ar leithligh ó thuairiscí úsáideoirí eile.
• Ní mór sonraí maidir leis an modhnóireacht reatha a áireamh sna tuarascálacha trédhearcachta, lena n-áirítear próisis, oiliúint, scileanna, uathoibriú, gníomhaíochtaí agus cinntí, agus iad teoranta dóibh sin amháin. 

• Rochtain a cheadú chun ábhar a d’fhéadfadh a bheith mídhleathach a thuairisciú ó áit ar bith san Aontas. 
• Cumarsáid a dhéanamh leo siúd a thuairiscíonn ábhar a d’fhéadfadh a bheith mídhleathach, lena n-áirítear admháil go bhfuarthas an gearán.
• Réasúnaíocht shoiléir beartais a sholáthar dóibh siúd a uaslódálann ábhar srianta nó toirmiscthe agus beart á dhéanamh acu ar a n-ábhar nó ar a gcuntais.  D’fhéadfaí a áireamh ar na gníomhaíochtaí athruithe ar infheictheacht, ar rochtain nó ar luach airgid, a dhéantar go réamhghníomhach agus go frithghníomhach.
• Tuairiscigh don Gharda Síochána (nó d’údarás áitiúil um fhorfheidhmiú an dlí) aon chion coiriúil amhrasta a d’fhéadfadh bagairt ar bheatha nó ar shábháilteacht a bheith mar thoradh air chomh luath agus is féidir.

Oibleagáidí ar gach ardán ar líne (catagóirí 3, 4)

• Achomhairc a éascú uathu siúd a thuairiscíonn nó a uaslódálann ábhar achrannach maidir le gníomhaíochtaí a rinneadh nó nach ndearnadh ar feadh sé mhí ó thráth an ghnímh sin. Baineann sé seo le téarmaí gearán seirbhíse agus gearán faoi Fhógraí agus Gnímh.
• Ní mór gníomhú ar ghearáin ar bhealach tráthúil, neamh-idirdhealaitheach, dícheallach agus neamhthreallach. 
• Ní mór foireann atá cáilithe go cuí a sholáthar chun cinntí a dhéanamh agus gan a bheith ag brath ar uathoibriú amháin.
• Ní mór rochtain ar mheicníochtaí díospóide lasmuigh den chúirt a sholáthar le gach cumarsáid gníomhaíochta. 
• Ní mór rochtain ar an sásra Fógra agus Gnímh nó rochtain ar an ardán seirbhíse a chur ar fionraí dóibh siúd a thuairiscíonn nó a uaslódálann ábhar fadhbach a bhaineann mí-úsáid as an tseirbhís go minic (trí ábhar ar follasach go bhfuil sé mídhleathach a uaslódáil nó trí ghearáin ar follasach go bhfuil siad gan bhunús a dhéanamh). D’fhéadfadh an srian sin a bheith ann ar feadh tréimhse shainithe ama nó ar feadh tréimhse éiginnte.
• Maidir le tuarascálacha trédhearcachta:
  • Ní mór sonraí maidir le réiteach díospóidí lasmuigh den chúirt agus gníomhaithe maslacha a chur ar fionraí a chur san áireamh
  • Ní mór na tuarascálacha trédhearcachta a chur ar fáil go poiblí gach 6 mhí.
  • Ní mór gach gearán agus toradh a bhaineann le Ráitis ar Chúiseanna agus Fógra agus Gníomh a chur faoi bhráid an Choimisiúin Eorpaigh. Bunachar Sonraí Trédhearcachta an DSA ar fáil anseo.
• An cumas a sholáthar dóibh siúd a uaslódálann ábhar a n-ábhar a chlibeáil mar chumarsáid tráchtála.
• Ní mór d’ardáin ar líne a bhfuil fógraí á dtaispeáint acu ábhar mar sin a thaispeáint go soiléir agus ní mór dóibh faisnéis a sholáthar maidir le foinse agus maoiniú an fhógra.
• Mínigh sna téarmaí agus coinníollacha príomhpharaiméadair a gcóras moltaí.
• Bearta a chur chun feidhme chun sábháilteacht, príobháideachas agus slándáil mionaoiseach a úsáideann a seirbhís a chinntiú.

 Oibleagáidí ar gach ardán agus inneall cuardaigh an-mhór ar líne (catagóir 4) 

• Measúnú riosca bliantúil a dhéanamh lena dtugtar cuntas ar thionchar na gcóras moltaí, na gcóras modhnóireachta ábhair, agus fhorfheidhmiú na dtéarmaí agus na gcoinníollacha.
• Líon na n-úsáideoirí a fhoilsiú gach sé mhí ar rannán den chomhéadan ar líne atá ar fáil go poiblí 
• Bí trédhearcach le córais moltaí, cinntí modhnóireachta ábhair, agus fógraíocht.
• Stór poiblí fógraí a chur ar fáil agus a chothabháil.
• Feidhm chomhlíonta inmheánach a bhunú.

Cé na hairteagail den Ghníomh um Sheirbhísí Digiteacha a bhfuil feidhm acu maidir liomsa?

• Má tá os cionn 45 mhilliún úsáideoir de chuid an Aontais ag do ghnólacht, d’eagraíocht nó do sheirbhís ar líne, beidh feidhm ag Airteagail 1 go 48 den Ghníomh um Sheirbhísí Digiteacha.
• Má tá níos lú ná 45 mhilliún úsáideoir de chuid an Aontais ag do ghnólacht, d’eagraíocht nó do sheirbhís ar líne, beidh feidhm ag Airteagail 1 go 32 den Ghníomh um Sheirbhísí Digiteacha.
• Más fiontar beag nó micrifhiontar (a fhostaíonn níos lú ná 50 duine agus nach sáraíonn a láimhdeachas bliantúil agus/nó iomlán a gclár comhardaithe bliantúil EUR 10 milliún) é do ghnólacht, d’eagraíocht nó do sheirbhís ar líne, cuirtear oibleagáidí breise as an áireamh.

Scriostóir miotas

Miotas: Níl ábhar á chraoladh agam, mar sin níl feidhm ag an DSA maidir liom.  

Fíoras: Clúdaíonn an Gníomh um Sheirbhísí Digiteacha raon leathan seirbhísí ar líne ó chraoltóireacht go margaí ar líne go bonneagair dhigiteacha

Miotas: Níl físeán ar éileamh á chur ar fáil agam, mar sin níl feidhm ag an DSA maidir liom.

Fíoras: Tá feidhm ag an nGníomh um Sheirbhísí Digiteacha maidir le raon seirbhísí ar líne, chomh maith le físeáin ar éileamh agus cruthú ábhair.

Miotas: Níl feidhm ag an DSA maidir le húinéirí gnólachtaí beaga

Fíoras: Tá feidhm ag an DSA maidir le micrifhiontair agus fiontair bheaga, ach tá níos lú oibleagáidí ar na fiontair sin, áfach. Is iad fiontair bheaga agus micrifhiontair na fiontair sin ina bhfuil níos lú ná 50 duine fostaithe agus nach bhfuil a láimhdeachas bliantúil agus/nó iomlán a gclár comhardaithe bliantúil níos mó ná €10 milliún.

Miotas: Ní cheadaíonn mo shuíomh gréasáin ná m’ardán d’úsáideoirí ábhar a ghiniúint, dá bhrí sin níl feidhm ag an nGníomh um Sheirbhísí Digiteacha maidir liom

Fíoras: Féadfaidh feidhm a bheith ag an DSA freisin maidir le suíomhanna gréasáin agus ardáin nach dtacaíonn le hábhar arna ghiniúint ag úsáideoirí.

Miotas: Oibrím samhail ghnó B2B, dá bhrí sin níl feidhm ag an DSA maidir liom

Fíoras: Ní chinneann oibriú ar bhonn gnólacht le gnólacht cé acu atá nó nach bhfuil gá le gnólacht, eagraíocht nó seirbhís ar líne chun oibleagáidí faoin DSA a chomhlíonadh.

Miotas: Éilíonn mo shuíomh gréasáin go gcaithfidh úsáideoirí cuntais a chruthú chun teagmháil a dhéanamh lenár suíomh, mar sin níl feidhm ag an DSA maidir liom.

Fíoras: Ní bhíonn tionchar ag an gceanglas maidir le cuntas úsáideora ar cé acu atá nó nach bhfuil feidhm ag an nGníomh um Sheirbhísí Digiteacha.